ﻣﺶ ﻛﺎﻥ ﻓﻰ ﻣﻮﻟﻮﺩ ﻣﻦ ﺯﻣﺎﻥ
ﻓﺎﺗﺢ ﺧﺸﻴﻤﻮ ﺯﻱ ﺍﻟﻮﺩِﻉ ؟
ﺷﺎﻓﻊ ﻗﺪُﺭ ﻣﺎ ﻳﺮﺿّﻌﻮﺍ
ﻳﺼﺮﺥ .. ﻛﺄﻧّﻮ ﻭ ﻻ ﺭﺿِﻊ !
ﻭ ﺍﻷﻡ ﺗﻠﻮﻟﻲ ﻭ ﺗﺴﻘﻲ ﻓﻲ
ﺷﺎﻗِﻴﻬﺎ ﺷِﻘّﻴﺶ ﻣﺎ ﻭُﺿِﻊ
ﺃﻫﻮ ﺩﺍ ﺍﻟﺒِﺼﻴﺮ ( ﻣﺴﺆﻭﻝ ﻛﺒﻴﺮ )
ﺷﺮﻓﺎﻥ ... ﻣﻊ ﻓﺮﻕ ﺍﻟﻮﺿِﻊ
@@@
ﺍﻷﺻﻞ ﻓﺮﻫَﺪ ﺟُﻮﻉ ﺳﺨﻴﻒ
ﻣﻨّﻮ ﺍﻧﺒﻬﻞ ﻣﻠﻴﻮﻥ ﻓﺮِﻉ
ﻭ ﺧﺴﺮﻧﺎ ﻣﻌﺮﻛﺔ ﺍﻟﻌﻤُﺮ
ﺑﻲ ﺍﻟﻮﻋﻲ / ﻣﺎ ﺣَﺮﺑﺔ ﻭ ﺩِﺭِﻉ
ﻭ ﺍﻟﻤﺎ ﻋﺮﻑ ﻃﻌﻢ ﺍﻟﻴﻘﻴﻦ -
ﻣﻦ ﺻُﻐﺮﻭ - ﻛﻴﻒ ﺡ ﻳﺸِﺐ ﻭﺭِﻉ ؟
ﻧَﺸّﻒ ﺣﻠﻴﺐ ﺍﻷﻡ ﺯﻣﺎﻥ
ﻭ ﺍﻵﻥ : ﻟِﻘﻲ ﺍﻟﻮﻃﻦ / ﺍﻟﻀّﺮِﻉ
@@@
ﺩﺍ ﺍﻟﻜﺎﻥ ﺯﻣﺎﻥ ﺣﺎﺳْﺪ ﺍﻟﻀﻴﻮﻑ
ﻓﻰ ﻟﻮﻥ ﻛﺒﺎﺑﻴﻬﻢ - ﻃِﻤِﻊ
ﻳﺨﻄﻒ ﻓﻄﻮﺭ ﺍﻟﻤﺪﺭﺳﺔ
ﻭ ﺣﻴﺮﺓ ﺯﻣﺎﻳﻠﻮ ﺗﺴﻴﻞ ﺩَﻣِﻊ
ﻣﺎ ﺍﻇﻨّﻮ ﺑﻲ ﻫﻢّ ﺍﻟﺠُﻤﻮﻉ
ﺃﻭ ﺑﻲ ﺍﻟﻌﺪﺍﻟﺔ ﻳﻜﻮﻥ ﺳِﻤِﻊ
ﻛﺮﺳﻲ ﺍﻷﻧﺎﻧﻴﺔ ﺍﻟﺒﻐﻴﺾ
ﺣﺠّﺮ - ﻓﻰ ﺇﺿﻨﻴﻬﻮ - ﺍﻟﺸّﻤِﻊ
@@@
ﻳﺎ ﻛﻞّ ﻭﺍﻟﺪ ﻭ ﻛﻞّ ﺃﻡ :
ﻓﻰ ﻃﻔﻠﻜﻢ ﺑﺬﺭﺓ ( ﻟَﺒِﻊ )
ﻭ ﻋﻠﻴﻜﻢ ﺍﻧﺘﻮ ﺗﻘﺮّﺭﻭﺍ
ﻟﻲ ﻳﺎﺗﻮ ﻧﻬْﺞ ﺡ ﻳﺘّﺒِﻊ ؟
ﺣﺴْﺐ ﺍﺑﻦ ﺁﺩﻡ .. ﻟُﻘﻤﺘﻴﻦ
ﻳﺎ ﺭﻳﺖ ﺩﺍ ﻓﻰ ﺍﻟﺒﺎﻝ ﻳﻨﻄﺒِﻊ
ﻣﺎ ﺍﻟﺴُﻠﻄﺔ ﺑﻲ ﻣﻔﻬﻮﻡ ﺑﺴﻴﻂ :
ﻧﻘﺪﺭ ﻧﻘﻮﻝ ﻫِﻲ " ﺷَﻨﺎﺓ ﻃﺒِﻊ " ..
ليست هناك تعليقات:
إرسال تعليق