ﻏِﻠﻄﺖَ ﻭ ﻧﻔﺴﻲ ﺗﻐﻔﺮ ﻟﻲْ
ﺿﻤﻴﺮﻱ ﻋﻴﻮﻧﻮ ﺑﻜّﺎﻳﺔ
ﻭ ﻟﻮ ﻗﺴّﺎﻙ ﻋﺪﻡ ﻏﻠَﻄﻚ
ﺗﺄﻛّﺪ ﻏﻠﻄﺘﻚ ﺟﺎﻳﺔ
@@@
ﺃﻧﺤﻨﺎ ﻋﻠﻰ ﺍﻷﺭﺽ ﻋﺎﻳﺸﻴﻦ
ﺑﺸﺮ ﻣﺎ ﺑﺸﺒﻬﻮ ﺍﻟﺠﻨّﺔ
ﺑﻨﻐﻠﻂ ﻭ ﻟﻤﺎ ﻣﺎ ﻧﻜﺎﺑﺮ
ﺑﻨﺤﺘﺎﺝ ﺭﻭﺡ ﺗﻄﻤﻨّﺎ
ﺻﺤﻴﺢ ﻳﺎ ﻣﺎ ﻏﻠﻂ ﺟﺎﺭﺡ
ﻓﺘﺢ ﺃﻣﻴﺎﻝ ﻣﻦ ﺍﻷﻧّﺔ
ﺑﺲ ﺍﻟﻨﺪﻡ ﺍﻟﺒﻜﻮﻥ ﺻﺎﺩﻕ
ﺃﺧﻴﺮ ﻓﻲ ﺣﻜﻤﻮ ﻧﺘﺄﻧﻲّ
@@@
ﺗﻔﺎﺻﻴﻞ ﺍﻟﺤﻴﺎﺓ ﺍﻟﻘﺎﺳﻴﺔ -
ﺍﻟﺒﻘﺖ ﻣﻠﻴﺎﻧﺔ ﺗﻌﻘﻴﺪﺍﺕ
ﺗﺨﻠﻲ ﺣﺒﻴﺐ ﻳﺒﻜّﻲ ﺣﺒﻴﺐ
ﻭ ﻳﻤﻀﻲ ﻋﻠﻰ ﻛَﺸِﻒ ﺩﻣﻌﺎﺕ
ﺑﺲ ﺍﻟﺰﻭﻝ ﻟﻮ ﻗِﺪﺭ ﺳﺎﻣَﺢ
ﻭ ﺟﻮﺍﻫﻮ ﺍﻟﻐﺒُﻦ ﻣﺎ ﺑﺎﺕ
ﻳﻜﻮﻥ ﻳﺎ ﺑﺨﺘﻮ ﺑﻲ ﻗﻠﺒﻮ
ﺍﻝ .. ﻓﺘﺢ ﺑﻲ ﺍﻟﺮﻗﺔ ﺑﻮﺍﺑﺎﺕ
@@@
" ﻋﺸﺎﻥ ﺗﺘﻌﻠﻢ ﺍﻟﻐﻔﺮﺍﻥ "
ﺩﻱ ﻗﺎﻻ ( ﺗﺠﺎﻧﻲ ﺣﺎﺝ ﻣﻮﺳﻰ )
ﻭ " ﺗﺼﻔﺢ ﻟﻮ ﺯﻣﻦ ﺟﺎﺭ ﺑﻴﻚ "
ﺑﻘﺖ ﺯﻱ ﻗﻴﻤﺔ ﻣﻮﺭﻭﺛﺔ
ﺟﻤﻴﻞ ﻓﻲ ﻟﻤﺔ ﻭ ﻻّ ﻓﺮﺍﻕ
ﺗﻜﻮﻥ ﻓﻲ ﺳﻤﺎﺣﺔ ﻣﻐﺮﻭﺳﺔ
ﻋﻠﻰ ﺻﺎﺝ ﺍﻷﺳﻰ ﺍﻟﺤﺮّﺍﻕ
ﻛِﺴَﻴﺮﺓ ﺭﺣﻤﺔ - ﺑﻨﻌﻮﺳﺎ
@@@
ﺣﻘﻴﻘﻲ ﻟﻮ ﺍﻟﻐِﻠِﻂ ﺣﺴّﺎﺱ
ﺑﺘﻠﻘﻲ ﺍﻟﻐﻠﻄﺔ ﺟﺎﺭﺣﺎﻫﻮ
ﻭ ﺍﺫﺍ ﺍﻟﻤﻐﻠﻮﻁ ﻋﻠﻴﻬﻮ ﻧﺴﻲ
ﻫﻮ ﻭﺟﻌﺘﻮ ﻣﺎ ﺑﺘﻨﺴﺎﻫﻮ
ﻋﺸﺎﻥ ﻛﺪﻩ ﻟﻤﺴﺔ ﺍﻟﻐﻔﺮﺍﻥ
ﺑﺠﺪ ﻻﺯﻣﺎﻫﻮ ﻻﺯﻣﺎﻫﻮ
ﺻﻌﺐ ﺇﻧﺴﺎﻥ ﻳﻮﺍﺟﻪ ﻳﻮﻣﻰ/
ﻧﻔﺴﻮ ﺍﻟﻤﺎ ﻣﺴﺎﻣﺤﺎﻫﻮ
@@@
ﺿﻌﻴﻔﻴﻦ ﻧﺤﻨﺎ ﻳﺎﺧﻰ / ﺷﺪﻳﺪ
ﻭ ﻣﻬﻤﺎ ﻗِﻮَﺕ ﺳﻮﺍﻋِﺪﻧﺎ
ﻓﻲ ﻭﺍﻗﻊ ﻛﻞّ ﻳﻮﻡ ﺑﺜﺒﺖ :
" ﻃﻨﻴﻦ ﺑﺎﻋﻮﺿﺔ ﺑﺠﻬِﺪﻧﺎ "
ﻭ ﻣﺎ ﺳﺎﻫﻞ ﻧﻄﻴﺮ ﻟﻲ ﺍﻟﻨﻮﺭ
ﻣﻊ ﺍﻟﻄﻴﻦ ﺍﻟﺒِﺠﺎﺑﺪﻧﺎ
ﻓﺤﻘّﻮ ﻧﺴﺎﻣﺢ ﺍﻟﺘﺎﻧﻴﻦ
ﺳﻤﺎﺣﻨﺎ ﺩﺍ ﻫﻮ ﺍﻟﺒﺴﺎﻋﺪﻧﺎ
@@@
ﻏِﻠﻄﺖَ ﻭ ﻧﻔﺴﻲ ﺗﻐﻔﺮ ﻟﻲْ
ﺿﻤﻴﺮﻱ ﻋﻴﻮﻧﻮ ﺑﻜّﺎﻳﺔ
ﻭ ﻟﻮ ﻏﺮّﺍﻙ ﻋﺪﻡ ﻏﻠَﻄﻚ
ﺗﺄﻛّﺪ ﻏﻠﻄﺘﻚ ﺟﺎﻳﺔ
ليست هناك تعليقات:
إرسال تعليق